२१ कात्तिक, काठमाडौं । जो बर्न्स र डेभिड वार्नरले इतिहास रचेपछि न्यूजिल्याण्डविरुद्धको पहिलो टेष्टमा अष्ट्रेलिया हावी भएको छ ।

अष्ट्रेलियाका ओपनर जो बर्न्सले ब्याक टु ब्याक छक्का हान्दै मेडन शतक बनाए भने बार्नरले दुबै इनिङमा शतक बनाएका छन् ।

तेस्रो दिनेको खेल सकिनु केही अघि मात्र आउट भएका बर्न्सले १२९ रन बनाए भने बार्नरले ११६ रन जोडे । दिनको खेल सकिँन्दा अष्ट्रेलियाले ४ विकेट गुमाएर २६४ रन बनाएको छ र समग्रमा ५०३ रनको अग्रता लिएको छ । पहिलो इनिङमा अष्ट्रेलियाले ५५६ रन बनाएको थियो ।

घरेलु मैदानमा मेडन शतक हान्न बर्न्सले १०२ बलको सामना गरे । दोस्रो इनिङमा ओपनरद्वय बर्न्स र बार्नर चम्किएपछि पुनरागमन गर्ने न्यूजिल्याण्डको योजना धरासायी बनाएका छन् ।

बार्नरले पहिलो इनिङमा १६३ रन बनाएका थिए । पहिलो इनिङमा १६१ रनको साझेदारी गरेका बर्न्स र बार्नरले दोस्रो पारीमा २३७ रनको साझेदारी गर्दै इतिहास रचेका छन् ।

पछिल्लो ८४ वर्षमा अष्ट्रेलियाले टेष्ट क्रिकेटमा दुबै इनिङमा पहिलो विकेटका लागि १५० भन्दा बढीको साझेदारी गरेको यो पहिलो पटक हो ।

यसअघि सन् १९३० मा इंग्ल्याण्ड विरुद्ध मात्र दुबै इनिङमा पहिलो विकेटका लागि १५० भन्दा बढीको साझेदारी भएको थियो ।

यसअघि ५ विकेटको क्षतिमा बनाएको १५७ रनबाट न्यूजिल्याण्डले तेस्रो दिनको खेल थालेको थियो । ५५ रनबाट अघि खेल्न थालेका केन विलियम्सनले शतक बनाए । तर, अन्य ब्याट्सम्यान चल्न सकेनन्, र न्यूजिल्याण्ड ३१७ रनमा अलआउट भयो ।